Massa: Ný lið hættuleg á brautinni

Felipe Massa telur að nýju lið í Formúlu 1 séu það hægfæra að hætta geti skapast í brautinni við framúrakstur þeirra öflugri.

Þrjú spáný lið keppa í Formúlu 1 í ár, Lotus, Virgin, Hispania og svo Sauber Ferrari sem er nýtt lið á gömlum belgjum og hefur staðið sig vel á æfingum. Hin hafa verið hæg til þessa, enda að taka fyrstu skrefin. Hispania liðið hefur reynar ekki farið einn metra á æfingum og mæta á æfingu í fyrsta skipti á æfingu í Bahrein á föstudag.

"Ég vona að nýliðarnir verði ekki hættulegir. Það eru sex eða sjö lið sem munar sekúndu á, en svo önnur 4 sekúndum á eftir. Það er ekki gott fyrir íþróttina, né heldur liðin. Þetta eru eins og tvær mótaraðir séu í gangi", sagði Massa í samtali við ítalska dagblaðið Corriere della Sera sem var svo birt á vefsíðu Ferrari. Þannig að Ferrari mönnum er mikið í mun að koma þessum skilaboðum á framfæri.

Forseti Ferrari hefur ekki verið sérlega hrifinn af framgangi FIA í málum nýrra liða og vildi frekar sjá Toyota og BMW áfram í Formúlu 1, heldur en lið með ekkert nafn eða reynslu á bakvið sig. Liðin eru þó skipuð reyndum mönnum úr heimi akstursíþrótta.