Bloomberg: Actavis og Teva slást um Ratiopharm

Á Reuters er nákvæm greining á möguleikum Actavis, Teva og Pfizer á að ná Ratiopharm og hvað það myndi hafa í för með sér fyrir hvert þeirra í framtíðinni. Samkvæmt Reuters stendur Actavis vel að vígi í samanburðinum.

Teva er hinsvegar stærsta samheitalyfjafyrirtæki heimsins og sagt hafa djúpa vasa til kaupanna en reiknað er með að 3 milljarðar evra fáist fyrir Ratiopharm. Áður hefur komið fram á Reuters að sænski fjárfestingarsjóðurinn EQT veiti Actavis fjárhagsstuðning.

Bæði Bloomberg og Reuters greina frá því að Deutsche Bank, aðallánadrottinn Actavis, standi að fullu á bakvið tilraun Actavis til að ná Ratiopharm. Með kaupunum telur bankinn að hann geti betur tryggt lán sín til Actavis sem nema nú rúmum 4 milljörðum evra. Einnig telur bankinn að það sé betra að koma sameinuðu félagi í verð. Reynt var að selja Actavis fyrir ári síðan en það gekk ekki.

„Minni stærð Actavis gæti höfðað til eigandans sem er fjölskylda," segir greinandinn David Windley hjá Jefferies í samtali við Reuters. „Þar að auki yrði yfirtaka Actavis nokkuð starfsmannavænni." Þar á Windley við að kvisast hefur út að Teva ætli að segja mörgum starfsmanna upp í höfuðstöðvum Ratiopharm í borginni Ulm.

Fari svo að Actavis nái að kaupa Ratiopharm mun samruni þessara tveggja fyrirtækja skapa þriðja stærsta samheitalyfjafyrirtæki heimsins.

Frétt Bloomberg byggir á þremur heimildum en talsmenn Actavirs og Teva vildu ekki tjá sig um málið.