Aðeins milljónamæringar hjá Danske Bank í Luxemborg

Það er ekki hægt að gerast viðskiptavinur hjá Danske Bank í Luxemborg nema viðkomandi hafi a.m.k. 400.000 evrur eða 68 milljónir kr. í eigu sinni. Þeim sem vilja verða viðskiptavinir bankans en hafa ekki framangreinda upphæð haldbæra er einfaldlega vísað á dyr.

Fjallað er um málið á börsen.dk. Þar segir að auk þessa þurfi þeir sem eigi minna en 100.000 evrur inn á reikningum sínum hjá Danske Bank í Luxemborg að greiða sérstakt gjald fyrir það. Nemur gjaldið 500 evrum á ári eða rúmlega 85.000 kr. Nordea er með svipaðar reglur hjá sínum dótturbanka í Luxemborg en þar er lágmarkið hinsvegar 300.000 evrur.

Klaus Mönsted Pedersen forstjóri Danske Bank International útskýrir þessar reglur þannig að vinnan fyrir viðskiptavinina í Luxemborg sé krefjandi og tímafrek. „Það kostar að veita þá ráðgjöf sem við bjóðum upp á og því er engin ástæða fyrir viðskiptin eða bankann að eiga kúnna sem ekki hafa þröf fyrir flókna ráðgjöf," segir Pedersen.

Dótturbanki Danske Bank í Luxemborg er einkum ætlaður Dönum sem búa utan Danmerkur. Um 20.000 Danir fluttu frá heimalandinu á síðasta ári en Pedersen vill ekki gefa upp hve margir Danir séu viðskiptavinir bankans í Luxemborg. Slíkt sé viðskiptaleyndarmál.