Auðvelt að hakka Facebooksíður með nýju forriti

Með nýju forriti er mjög auðvelt að hakka sig inn á Facebooksíður, Twitter eða Google. Þetta kemur fram í Ekstra Bladet. Um er að ræða forritið Firesheep en hægt er að keyra það á Firefox.

Forritið er hægt að nota þegar Facebooknotendur eru á opnu netsvæði með fartölvur sínar, til dæmis kaffihúsum, en forritið sýnir notenda sínum hverjir eru á netsvæðinu.

Shehzad Ahmad hjá netöryggisfyrirtækinu DK-Cert segir í samtali við Ekstra Bladet að ef farsíminn þinn er á sama þráðlausa netinu og tölvuþrjótur sem situr og fiskar eftir upplýsingum með Firesheep getur þrjóturinn fengið það sem hann vill án vandræða.

„Þú aftur á móti hefur enga möguleika á að vita hver það er á netinu sem er að kíkja yfir öxlina á þér og það er raunveruleg hætta á að þu missir gögnin þín," segir Ahmad.

Hingað til hafa 130.000 einstaklingar fengið sér Firesheep með niðurhali en það er bandaríski bloggarinn Eric Butler sem stendur að baki forritinu.

Til að komast hjá því að verða hakkaður verður viðkomandi að forðast opin netsvæði eða útvega sér aukaforritið Force-TLS hjá Firefox með niðurhali. Það forrit sér um að viðkomandi sé ávallt með öruggar tengingar á netinu.