Íþróttaandinn færði Red Bull tvo titla

Christian Horner hjá Red Bull telur að sterkur liðsandi hjá Red Bull hafi fært þeim báða meistaratitla í Formúlu 1, en Sebastian Vettel tryggði liðinu titil ökumanna í gær. Um síðustu helgi vann liðið titil bílasmiða. Um tíma virtist allt upp í loft á milli Mark Webber og Vettels og mikið fjaðrafok varð í fjölmiðlum fyrir næsta síðasta mót ársins vegna yfirlýsinga frá Webber um að Red Bull væri að hygla að Vettel. Tókst að lægja öldurnar, en engu að síður var samkeppninsandi á milli þeirra fyrir lokamótið í gær. "Þessir strákar hafa verið frábærir íþróttamenn og þetta hefur verið frábært ár fyrir Formúlu 1. Það að hafa gert þetta á réttan hátt inn á brautinni og án liðsskipanna og það að sá besti vann á endanum, þannig á þetta að vera", sagði Horner í frétt á autosport.com. Nokkuð var rætt um hvort Vettel myndi víkja í brautinni fyrir Webber, ef sú staða hefði komið upp í mótinu að slíkt þyrfti til að Red Bull næði titli ökumanna, frekar en Ferrari og Fernando Alonso. Til þess kom aldrei, þar sem Alonso gekk ekki nógu vel í mótinu. Hann þurfti fjórða sæti ef Webber ynni, en varð aðeins sjöundi. "Ég efast ekki um að Vettel hefði hjálpað. Hann er liðsmaður, en ég hefði aldrei beðið hann að víkja. Það hefði verið hans ákvörðun", sagði Horner. Vettel og Webber verða áfram hjá Red Bull á næsta ári "Mark er hluti af liðinu og frábær ökumaður sem fær annað færi á næsta ári. Hann pressaði á Vettel til lokamótsins og stundum hefur verið stutt í kveikjuþræðinum á milli þeirra og gengið upp og niður. Sebastian leiddi meistaramótið á réttum tíma, í síðasta mótinu. Hann getur verið stoltur af árangrinum", sagði Horner.