Brady hugsanlega á förum frá Patriots

Samningur ofurstjörnunnar Tom Brady við New England Patriots rennur út eftir næsta tímabil og óvíst er í dag hvort hann verði áfram í herbúðum félagsins.

Brady spilaði ekkert á síðustu leiktíð vegna meiðsla en hann stóð sig vel í vetur þó svo Patriots hafi verið flengt í fyrstu umferð úrslitakeppninnar af Baltimore Ravens.

Margir benda þó á að Brady sé ekki sami leikmaður og hann var áður. Því sé erfitt að réttlætta nýjan álíka stóran samning við leikmanninn. Vilji Patriots ekki gera annan risasamning við hann fær hann örugglega risasamning hjá mörgum öðrum félögum.

Patriots er því í erfiðri skák þessa dagana sem erfitt er að sjá fyrir endann á.

Peyton Manning, leikstjórnandi Colts, á einnig aðeins eitt ár eftir af samningi sínum við Indianapolis en hermt er að aðeins sé formsatriði að skrifa undir nýjan samning.