Hamar tryggði sér annað sætið með stórsigri í Keflavík

Hamarskonur unnu 16 stiga sigur á Keflavík í Toyota-höllinni í Keflavík í kvöld, 85-101, og tryggðu sér þar með annað sætið í Iceland Express deild kvenna í körfubolta. KR vann 66-45 stiga sigur á Grindavík í hinum leik A-deildarinnar en KR-konur voru fyrir nokkru búnar að tryggja sér deildarmeistaratitilinn.

Sigur Hamars þýðir að liðið er komið beint inn í undanúrslit úrslitakeppninnar en Keflavík (3. sæti) og Grindavík (4. sæti) þurfa aftur á móti að spila í sex liða úrslitum sem hefjast um næstu helgi.

Hamar þurfti að vinna leikinn með fimm stiga mun og Hvergerðingar tóku frumkvæðið í leiknum strax frá upphafi. Hamar var 4 stigum yfir eftir fyrsta leikhluta, 24-28, og sjö stigum yfir í hálfleik, 42-49. Hamar bætti við í þriðja leikhluta og leiddi með 14 stigum, 64-78, fyrir lokaleikhlutann.

Hamarskonur lönduðu síðan sigrinum örugglega í lokaleikhlutanum en sex leikmenn liðsins skoruðu 11 stig eða meira í leiknum í kvöld.

Úrslit og stigaskor í leikjum A-deildar í kvöld:

Keflavík-Hamar 85-101 (42-49)

Stig Keflavíkur: Kristi Smith 27, Birna Ingibjörg Valgarðsdóttir 15, Pálína Gunnlaugsdóttir 13, Svava Ósk Stefánsdóttir 12, Bryndís Guðmundsdóttir 11, Hrönn Þorgrímsdóttir 4, Eva Rós Guðmundsdóttir  3.

Stig Hamars: Julia Demirer 22, Sigrún Sjöfn Ámundadóttir 20, Fanney Lind Guðmundsdóttir 18, Kristrún Sigurjónsdóttir 13, Koren Schram 13, Guðbjörg Sverrisdóttir 11, Sóley Guðgeirsdóttir 3. Hafrún Hálfdánardóttir 1.

Grindavík-KR 45-66 (21-33)

Stig Grindavíkur: Michele DeVault 11, Jovana Lilja Stefánsdóttir 11, Íris Sverrisdóttir 9, Petrúnella Skúladóttir 7, Joanna Skiba 3, Helga Hallgrímsdóttir 2, Berglind Anna Magnúsdóttir 2.

Stig KR: Signý Hermannsdóttir 17, Margrét Kara Sturludóttir 16, Heiðrún Kristmundsdóttir 12, Unnur Tara Jónsdóttir 7, Helga Einarsdóttir 7, Guðrún Gróa Þorsteinsdóttir 5, Brynhildur Jónsdóttir 2.