Mercedes á enn möguleika á meistaratitlum

Ross Brawn framkvæmdarstjóri Mercedes liðsins, með þá Michael Schumacher og Nico Rosberg innanborðs telur að enn sé möguleiki á meistaratitlum. Hann vann tvöfalt í fyrra með Jenson Button og Brawn liðinu, áður en hann seldi Mercedes lið sitt. "Með nýja stigakerfinu sem notað er, þá erum við enn með möguleika gegn forystumönnunum og munum þróa bíl okkar til að verða samkeppnisfærari. Það er lítill munur á því hvort menn vinna eða tapa", sagði Brawn í frétt á autosport.com í dag. Fyrsta sætið gefur 25 stig, annað sætið 18, þriðja 15, fjórða 12 og síðan næstu sæti á eftir færri. Mercedes er 107 stigum á eftir McLaren sem er efst að stigum í keppni bílsmiða og Nico er með 74 stig í keppni ökumanna, Schumacher 34, en Lewis Hamilton er efstur með 109 stig. Mercedes gekk ekki nógu vel í tímatökum í síðasta móti og það kom niður á árangri liðsins, en Brawn vill meina að liðið hafi haft góðan keppnishraða á götum Melbourne. "Nico var einn sá fljótasti í keppninni og hann komst úr miðjum hóp í sjött sætið. Michael gerði góða hluti, en skemmdur framvængur og sprungið dekk varð honum til trafala í mótinu. Við vorum of bjartsýnir varðandi notkun á mjúku dekkjunum og það olli honum vandræðum." Næsta mót er á götum Valencia og liggur m.a. um hafnarsvæði borgarinnar að stærstum hluta. "Brautin er svipuð og í Montreal. Langir beinir kaflar eru tengdir hægum beygjum sem hentar okkar bíl. Við verðum með nýja hluti í bílnum, sem er liður í að færa okkur ofar", sagði Brawn.