Anton Sveinn vann annað árið í röð

Ægismaðurinn Anton Sveinn McKee vann 1500 metra skriðsund karla annað árið í röð í kvöld þegar hann synti á 16:03.35 mínútum í úrslitasundinu í Laugardalslauginni. Íslandsmeistaramótið í 25 metra laug hófst í kvöld.

Anton Sveinn sem er 17 ára gamall var meira en hálfri mínútu á undan liðsfélaga sínum Birki Snæ Helgasyni sem fékk silfrið en Birki synti á 16:33.98 mínútum. Konráð Hrafnkelsson úr SH synti á 16:40.51 mínútjm og fékk bronsið.

Anton Sveinn vann þessa grein á 16:16.92 mínútum í fyrra og var því að synda rúmum þrettán sekúndum hraðar í kvöld en fyrir ári síðan.