Alonso reiður útaf dómgæslunni

Spánverjinn Fernando Alonso er ekki sáttur við dómara mótsins á Valencia brautinni á Spáni. Hann telur að þeir hafi ekki gert rétt í refsingu á Lewis Hamilton sem var dæmd.

Hamilton fór framúr öryggisbíl sem var að koma útaf þjónustusvæðinu og græddi á því, en fékk síðan þá refsingu að aka aukalega inn á þjónustusvæðið.

"Þetta gar synt. Ekki fyrir okkur, heldur áhorfendur. Við vorum í þriðja sæti og öryggisbíllinn kom út, sem hentaði okkur ekki vel, en Hamilton fór framúr öryggisbílnum og framúr læknabílnum þegar gulum flöggum var veifað. Það voru nokkrir metrar á milli okkar, hann varð annar og ég níundi", sagði Alonso í samtali við spænska sjónvarpið samkvæmt frétt á autosport.com.

Ef marka má orð Alonso þá hefði Hamilton orðið áttundi á undan honum, ef hann hefði farið samkvæmt settum reglum og græðir því á atvikinu.

"Ég virti reglurnar og verð níundi og sá sem virðir þær ekki nær öðru sæti. Dómarar hljóta að hafa skoðað þetta vandlega miðað við tímann sem það tók að kalla hann inn til refsingar. Svona er þetta bara, allt vinnur á móti okkur og allt er leyft", sagði Alonso berlega svekktur.

Dómarar eru enn að skoða fleiri atvik sem komu upp í keppninni.