Sharapova ætlar að giftast Vujacic

Þó svo Sasha Vujacic sé ekki einn af betri mönnum LA Lakers er hann samt öfundaður af mörgum. Hann er nefnilega á föstu með rússnesku tennisgyðjunni Mariu Sharapovu og er nú búinn að trúlofast henni.

"Við erum búin að trúlofa okkur og erum ákaflega lukkuleg með það," sagði Vujacic við fjölmiðla.

Þau hafa verið saman í eitt ár og Vujacic hélt upp á þann áfanga með því að biðja hennar.

"Þetta var líklega gamaldags hjá mér. Ég er svolítið af gamla skólanum," sagði Vujacic léttur.

skötuhjúin hafa ekki ákveðið hvenær þau gangi í hnapphelduna.