Launahæsti bankamaður í Evrópu fær 2,4 milljarða króna á ári

Forstjóri Credit Suisses, Brady Dougan, er hæst launaði bankamaður í Evrópu. Hann fær um það bil 2,4 milljarða íslenskra króna í laun á ári, fullyrðir breska blaðið Financial Times.

Einungis John Stumpf, forstjóri bandaríska bankans Wells Fargo er launahærri. Hann fær 2,9 milljarða í laun á ári. Á eftir Dougan í röðinni kemur Josef Ackermann, forstjóri Deutsche Bank. Hann fær um það bil 1,7 milljarða í laun á ári.

Credit Suisses greiddi æðstu stjórnendum í fyrra alls um 19 milljarða íslenskra króna í laun. Sérfræðingur sem FT ræddi við telur að þessi tala geti hækkað þar sem ofurlaun bankamanna hafi ekki verið gagnrýnd eins mikið í Sviss og í mörgum öðrum ríkjum.

Langstærstur hluti af þeim 2,4 milljörðum sem Dougans fær í laun, eða um 2,2 milljarðar, eru bónusar og hlunnindi. Afgangurinn er föst laun.

Þensluárið mikla 2007 voru laun Hreiðars Más Sigurðssonar, þáverandi forstjóra Kaupþings, rúmar 740 milljónir yfir allt árið, samkvæmt tekjublaði Frjálsrar verslunar. Hann var launahæsti bankamaðurinn á Íslandi það árið. Lauslega áætlað námu laun forstjóra stóru íslensku bankanna um 15-17 milljónum króna á ári eftir þjóðnýtingu þeirra.