Belgískur nýliði ökumaður Virgin 2011

Virgin liðið tilkynnti í dag að Belginn Jerome D'Ambrosio verði með Timo Glock hjá liðinu á næsta ári í stað Lucas di Grassi. Belginn er 25 ára gamall og prófaði bíl Virgin á föstudagsæfingum í Singapúr, Japan, Kóreu og Brasilíu, auk þess að aka á æfingum fyrir nýliða eftir lokamótið í Abu Dhabi. Jerome hefur keppt í GP 2 mótaröðinni síðustu fjögur ár. "Ég er ánægður að hafa náð því takmarki að fá sæti hjá Marussia Virgin. Þegar ég kom til liðsins í september var það draumur að rætast. Það var mikill samkeppni um þetta sæti, en mér gekk vel með liðinu og fannst ég kominn á heimaslóðir", sagði Jerome. "Þetta eru metnaðarfullir fagmenn og verður gaman að vinna að uppbyggingu liðsins og ég er þakklátur því trausti sem liðið sýnir mér", sagði Jerome. Tuttugu mót verða í Formúlu 1 á næsta ári og hefst tímabilið í mars, en æfingar byrja í febrúar. Verða 24 ökumenn á ráslínunni og á eftir að skipa í örfá sæti enn sem komið er.