Sviss og Noregur ríkustu þjóðirnar, Ísland í tossaflokki

Svisslendingar og Norðmenn eru ríkustu þjóðir heimsins, miðað við auð að meðaltali á hvern einstakling. Íslendingar eru hinsvegar fallnir niður í tossaflokk hvað þetta varðar ásamt Argentínu.

Þetta kemur fram í árlegri skýrslu svissneska bankans Credit Suisse, Global Wealth Report. Þar segir að fullorðinn Svisslendingur á að jafnaði 373.000 dollara eða tæpar 42 milljónir kr. Hver Norðmaður sem kominn er á þrítugsaldurinn á að jafnaði 327.000 dollara í fórum sínum. Hér er átt við bæði fasteignir og lausafé.

Fram kemur að í þriðja sætinu á listanum eru Kínverjar sem verið hafa á hraðleið upp þennan lista á undanförnum árum. Í fjórða og fimmta sæti eru svo Bandaríkjamenn og Japanir.

Hvað Íslendinga og Argentínumenn varðar segir í skýrslunni að auður einstaklinga í þessum löndum hafi rýrnað um 30% milli ára og er það langmesta rýrnunin hjá þeim þjóðum sem fjallað er um í skýrslunni.

Hinsvegar kemur ekki fram um hve háar fjárhæðir er hér að ræða né í hvaða sæti á listanum Ísland er statt. Á árunum fyrir hrun voru Íslendingar þó yfirleitt í einu af topp tíu sætunum í úttektum sem þessari.

Úttekt Global Wealth Report nær til 4,4 milljarða einstaklinga um allan heim. Hinsvegar eru til 2,5 milljarður einstaklinga í heiminum sem eiga ekki bankareikning. Skýrslan fjallar ekki um þá.