Barcelona vann fyrsta leikinn án Lionel Messi

David Villa tryggði Barcelona 1-0 sigur á Sporting Gijón í spænsku úrvalsdeildinni í fótobolta í kvöld en Lionel Messi var bara í stúkunni í kvöld eftir að hafa verið sparkaður illa niður í síðasta leik.

David Villa skoraði sigurmarkið á 49. mínútu eftir að hafa fengið góða sendingu inn fyrir frá Dani Alves. Hann afgreiddi boltann örugglega í markið og tryggði sínum mönnum dýrmæt stig.

Þetta var annað deildarmark Villa á tímabilinu en það fyrsta sem hann skorar í deildinni á Nývangi. Villa var keyptur til Bracelona frá Valencia fyrir þetta tímabil.

Barcelona er í 3. sæti deildarinnar eftir fyrstu fjóra leikina einu stigi á eftir toppliði Real Madrid en með jafnmörg stig og Valencia sem spilar við Atlético Madrid seinna í kvöld.