Bankarisi bannar hvítlauk og mínipils

Svissneski bankarisinn UBS hefur sent starfsfólki sínu 43 síðna stóra handbók um hvernig það eigi að hegða sér á vinnustað. Meðal annars er starfsfólkinu bannað að borða hvítlauk og konum sem starfa við bankann er bannað að mæta til vinnu í mínipilsi.

Berlingske Tidende segir í umfjöllun um málið að handbókin minni helst á reglur úr ströngum svissneskum einkaskóla. Þar er starfsmönnum skipað að binda bindshnút sinn eftir settum reglum, fara í klippingu ekki sjaldnar en fjórðu hverja viku og að nærbuxur karla sem starfa við bankann eigi að vera úr góðu efni en alls ekki sýnilegar.

Jakkaföt karla hjá UBS eiga að vera í hlutlausum litum, helst svörtum, gráum eða dökkbláum. Hvað konurnar varðar er bannað að bera svart naglalakk og andlitsfarði eða varalitur sem grípur augað er alfarið bannaður.

Markmiðið með þessari handbók er víst að UBS er umhugað um að endurreisa orðspor sitt sem beðið hefur verulega hnekki í fjármálakreppunni.