Vettel lengi að ná taktinum

Þjóðverjinn Sebastian Vettel á Red Bull var fljótastur allra í tímatökum fyrir Formúlu 1 kappaksturinn í Suður Kóreu sem verður í nótt í fyrsta skipti. Vettel vann síðustu keppni og er jafn Fernando Alonso í stigamóti ökumanna, en þeir eru 14 stigum á eftir Mark Webber. Vettel náði besta tímanum í allra seinustu tilraun sinni í tímatökunni og Webber fylgdi í kjölfarið og þannig náði þeir besta tímanum af Alonso, sem hafði verið fljótastur. Mismunandi bílar virðast fljótari á einstökum svæðum í brautinni og Vettel svaraði til um þetta á fundi með fréttamönnnum. "Ég tel að munurinn liggi í því að ég gat lítið ekið í gær og í morgun var málið að ná taktinum réttum. Það er erfitt að skilja í hvernig sumum beygjum liggur, sérstaklega beygjur 9 og 10 og svo 11, langa vinstri beygjan sem hallar skemmtilega, en breytist í tólftu beygju sem hallar út. Það er margt sem þarf að læra, hvernig á að fara yfir kantana. Ef farið er of grimmt þyrlast upp rykið, sem hefur áhrif á möguleikann í næstu beygju, þannig að þetta var ekki auðvelt. En bíll okkar er góður í beygjum og við gerðum okkar besta á beinu köflunum og búnaðurinn sem bætir lofflæðið (F-Duct) virkar vel sem hjálpar. En við þurfum að berjast af meiri krafti í beygjunum til að ná góðum tímum." Þú varst fremstur á ráslínu og sigraðir í Japan. Fremstur í dag. Er þetta sprettur í lokin til að landa titlinum? "Ég hefði ekkert á móti því. Maður verður að taka hvert mót fyrir sig. Þetta gekk vel í Japan en núna erum við í Kóreu. Allt snýst um mótið á morgun, en ég er ánægður með stöðuna miðað við hvernig gekk á æfingum á nýtti braut. Ég náði ekki taktinum, en að lokum gekk vel. Bíllinn er fljótur, en það þarf að klára dagsverkið. Það var mikilvægast að missa ekki einbeitingu, vera rólegur og við vorum það allir. Við mættum því með sjálfstraust í tímatökuna. Vinnu dagsins er lokið, en við sjáum hvað gerist á morgun", sagði Vettel. Bein útsending frá Formúlu 1 mótinu í Suður Kóreu er í opinni dagskrá á Stöð 2 Sport kl. 05.30 í nótt, en endursýning verður kl. 17.05.