James Bond byssa seld á uppboði fyrir 50 milljónir

Skammbyssa sem Sean Connery í hlutverki James Bond hélt á við kynningu á myndinni From Russia With Love seldist á uppboði fyrir 50 milljónir króna.

Þetta er tífalt það verð sem talið var að fengist fyrir byssuna sem er af gerðinni Walther.

Það var Christie´s í London sem hélt uppboðið í London en á því voru ýmsir leikmunir úr þekktum kvikmyndum boðnir upp.

Athylgi vakti að sjaldgæfur Darth Vader eða Svarthöfðabúningur úr Star Wars myndinni The Empire Strikes Back seldist ekki. Fyrirfram var talið að búningurinn myndi seljast á ekki minna verði en fékkst fyrir James Bond skammbyssuna.