Alonso: Verðum að vinna mót

Spánverjinn Fernando Alonso klúðraði gullnu tækifæri á góðum árangri á götum Mónakó um helgina, þegar hann keyrði á vegg á lokaæfingu fyrir tímatökuna. Hann gat ekki tekið þátt í tímatökunni og ræsti í 24 sæti af stað og vann sig upp í sjötta sæti. Trúlega hefði hann getað barist um sigur, ef áreksturinn hefði ekki orðið honum til trafala. "Það er erfitt að segja til um hvað hefði getað orðið, ef ég hefði verið í tímatökunni. Ég var í formi og fremsti staður á ráslínu var innan seilingar. Við verðum að halda ró okkar, því árangurinn mun koma og ljóst hver öflugt lið okkar er. Það verður í lok 19 móta sem úrslitin ráðast í meistaramótinu og við sjáum hver er sterkastur. Ef ekki við, þá einhverjir sem stóðu sig betur, þó við höfum gert okkar besta", sagði Alonso í spjalli á espnf1.com. Hann var að sigurvegarnum ólöstuðum maður mótsins, eftir að hafa unnið sig upp um 18 sæti á ráslínu. "Red Bull er ósigrandi við eðlilegar aðstæður, en liðið hefur unnið og líka lent í ógöngum í mótum ársins, þannig að þeir hafa ekki stungið af. En við erum raunsæir og vitum að við verðum að bæta okkur. Við verðum að vera fljótari í tímatökum og vinna mót eins og Red Bull og vonandi gerist það fljótlega", sagði Alonso.