Reuters: Actavis í kjörstöðu að eignast Ratiopharm

Í nýrri frétt á Reuters kemur fram að Actavis sé nú komið í kjörstöðu til að eignast þýska samheitalyfjafyrirtækið Ratiopharm. Bandaríski lyfjarisinn Pfizer sé dottinn út úr kaupferlinu og Teva frá Ísrael ætli sér í mikinn niðurskurð á starfsfólki í Þýskalandi sem hugnist ekki eigendum Ratiopharm

Reuters hefur heimildir fyrir því að kaupin á Ratiopharm séu nú orðin að kapphlaupi milli Actavis og Teva. Actavis er með sænska fjárfestingarsjóðinn EQT sem bakhjarl en sá sjóður er í eigu Wallenberg fjölskyldunnar í Svíþjóð. Þá mun Deutsche Bank, aðal lánadrottinn Actavis, hafa lagt blessun sína yfir tilraun Actavis til að eignast Ratiopharm.

Augljóst er að Teva hefur mun meira fjárhagslegt bolmagn en Actavis, þrátt fyrir stuðing Wallenberg fjölskyldunnar, enda er Teva stærsta samheitalyfjafyrirtæki heimsins. Hinsvegar hefur kvisast út að Teva hyggur á fjöldauppsagnir í borginni Ulm þar sem höfuðstöðvar Ratiopharm eru. Þetta mun víst standa þversum í kokinu á Merckle-fjölskyldunni sem á Ratiopharm.

Á móti þessu hefur Actavis, að sögn Reuters, skuldbundið sig til þess að halda störfunum í Ulm ef svo fari að Actavis kaupi Ratiopharm. Það þykir einnig hafa styrkt stöðu Actavis að fyrirtækið hefur ráðið Claudio Albrecht sem ráðgjafa sinn við kaupin. Albercht er fyrrverandi forstjóri Ratiopharm.

Eins og áður hefur komið fram fer Merckle fjölskyldan fram á 3 milljarða evra sem lágmarksverð fyrir Ratiopharm.