Malasíu-kappaksturinn flautaður af - Button úrskurðaður sigurvegari

Jenson Button hjá Brawn er búinn að vinna tvær fyrstu keppninnar í formúlu eitt á tímabilinu en hann var úrskurðaður sigurvegari í Malasíu-kappakstrinum í dag þegar það þurfti að hætta keppni vegna mikillar rigningar.

Jenson Button var á ráspól en byrjaði kappaksturinn illa og datt niður í fjórða sætið. Honum tókst þó að vera kominn í efsta sætið á nýjan leik áður en stoppa þurfti keppnina vegna ótrúlegrar rigningar.

Brautin breyttist fljótt í sundlaug og það varð strax ljóst að ekki var hægt að halda áfram með keppnina. Mótshaldarar héldu þó í vonina með að geta enduræst keppnina alla tvo tímana sem þeir höfðu upp á að hlaupa en úr því varð þó aldrei.

Lokaröðin fór eftir því hvernig staðan var í keppninni þegar öryggisbíllinn kom inn á brautina en keppni var síðan endanlega hætt á 32. hring.

Keppendur fá samt aðeins helming stiga fyrir þessa keppni þar sem ekki tókst að ljúka nægilega stórum hluta af kappakstrinum. Þetta er aðeins í fimmta skipti sem það gerist í sögu formúlunnar.

Jenson Button fær því bara fimm stig fyrir sigurinn en hann er í efsta sæti í keppni ökumanna með 15 stig eða fimm stigum meira en félagi hans hjá Brawn-Mercedes, Rubens Barrichello.

Lokaröðin í Malasíu-kappakstrinum:

1. Jenson Button, Brawn

2. Nick Heidfeld, BMW Sauber

3. Timo Glock, Toyota

4. Jarno Trulli Toyota

5. Rubens Barrichello, Brawn

6. Mark Webber, Red Bull

7. Lewis Hamilton, McLaren

8. Nico Rosberg, Williams

Efstu menn í keppni ökumanna:

1. Jenson Button, Brawn-Mercedes 15

2. Rubens Barrichello, Brawn-Mercedes 10

3. Jarno Trulli, Toyota 8.5

4. Timo Glock, Toyota 8

5. Nick Heidfeld, BMW Sauber 4

6. Fernando Alonso, Renault 4