Magnús Þór: Ég var funheitur í kvöld

„Það er náttúrulega frábært að vinna tvo leiki á tæpri viku gegn firnasterku liði KR og við erum í skýjunum með það. Þetta var svona dæmigerður bikarleikur og þó svo að vörnin hafi ef til vill ekki gengið upp alveg eins og við lögðum upp með þá vantaði ekki sigurviljann í liðið.

Við vorum harðákveðnir í að komast áfram og það gekk sem betur fer upp," sagði Magnús Þór Gunnarsson sem átti stórleik í 90-86 sigri Njarðvíkur gegn KR í 32-liða úrslitum Subway-bikarsins í Njarðvík í kvöld.

„Ég var funheitur í kvöld og ég var ákveðinn í að sýna mitt rétta andlit í kvöld þar sem mér fannst ég vera hræðilegur í sigurleiknum gegn KR í deildinni. Þetta gekk bara glæsilega," sagði Magnús Þór.