Hinir ríkustu gætu þróast yfir í aðra manntegund

Ríkustu íbúar jarðarinnar gætu þróast yfir í aðra manntegund í framtíðinni vegna framfara í líftækni og hönnun vélmenna. Þetta segir bandaríski framtíðarfræðingurinn Paul Soffo.

Í umfjöllun blaðsins Sunday Times um málið kemur fram að Soffo segir að í framtíðinni muni fólk geta ræktað sín eigin líffæri og skipt þeim út fyrir þau gömlu, tekið inn sérhönnuð lyf sem lengja æfi þeirra og notað genatækni til að fá aðvörun um ættgenga sjúkdóma og kvilla.

Þetta rímar nokkuð við orð bandaríska vísindamannsins Ray Kurzweil sem segir að ódauðleikinn sé aðeins 20 ár inn í framtíðinni vegna hraðrar þróunar í örtækni (nanotechnology).

Soffo segir að heimur morgundagsins verði samruni líffræði og tækni þar sem vélmenni sinni störfunum, bílar aki sér sjálfir og gervilimir verði betri en raunverulegir.

Sá hængur er á málinu að aðeins þeir ofurríku muni geta borgað fyrir þetta. Framfarirnar muni leiða til mismununar milli stétta og að endanum gætu hinir ofurríku þróast yfir í aðra manntegund.

„Á níunda áratugnum kom einkatölvan út úr bílskúrnum og breytti heiminum. Á tíunda áratugnum var það netið. Næsti stóri hluturinn í lífi okkar verða vélmenni," segir Soffo í viðtali við Sunday Times.