O´Sullivan sigraði á mastersmótinu

Englendingurinn Ronnie O´Sullivan vann sinn fjórða sigur á mastersmótinu í snóker á Wembley þegar hann bar sigurorð af landa sínum Mark Selby sem átti titil að verja á mótinu.

Hinn 33 ára gamli O´Sullivan, sem kallaður er eldflaugin vegna þess hve hratt hann leikur, lenti undir 7-5 en skaust fram úr með því að vinna þrjá ramma í röð og tók í þeim stuð upp á 69, 70 og 110.

O´Sullivan vann að lokum 10-8 og tryggði sér sigurinn þegar hinum 25 ára gamla Selby mistókst að setja niður langa rauða í átjánda rammanum þegar komið var fram undir miðnætti í gær.