L´Oréal erfingi gaf ljósmyndara 183 milljarða

4. desember 2009 11:29

Margmilljarðamærin og erfingi L´Oréal veldisins, hin 87 ára gamla Liliane Bettencourt, hefur gefið uppáhalds ljósmyndara sínum einn milljarða evra eða rúmlega 183 milljarða kr. Þetta hefur leitt til mikils fjölskyldudrama í Frakklandi því dóttir Liliane telur hana ekki lengur með fullum sönsum og vill að móðir sín komist undir eftirlit dómstóla.

Liliane Bettencourt er óumdeilanlega auðugasta kona Frakklands en nú hefur dóttir hennar Francoise, sem sjálf er 56 ára, fegnið nóg af gjafmildi þeirrar gömlu. Hefur dóttirin því beðið héraðsdómstólinn í Nanterre, einu úthverfa Parísar, að grípa inn í málin..."til þess að verja Liliane Bettencourt fyrir misnotkun..." eins og það er orðað í málskjölunum.

Lögmaður Liliane segir að þetta sé ekkert annað en tilraun af hálfu dótturinnar til að tryggja sér meiri arf frá móðurinni.

Samkvæmt frásögn á business.dk um málið er það ljósmyndarinn og rithöfundurinn Francois-Marie Banier sem hefur notið hinnar miklu gjafmildi Liliane. Frá því á síðasta áratug hefur Lilane gefið honum peninga, tryggingar og listaverk sem talin eru meir en milljarðs evra virði.