Auðir skýjakljúfar í farvatni hrunsins á Wall Street

Allar líkur eru á að stærstu bankar og fjármálastofnanir í New York muni yfirgefa skrifstofuhúsnæði í skýjakljúfum borgarinnar svo nemur milljónum fermetra í ár. Borgin býr sig undir verstu dýfu á fasteignamarkaði sínum í yfir áratug.

Í frétt um málið á Bloomberg-fréttaveitunni kemur fram að autt skrifstofuhúsnæði muni verða af stærðargráðunni ríflega 2,5 milljónir fermetra við árslok.

Þegar hafa bankar eins og JPMorgan Chase, Citigroup, hinn gjaldþrota Lehman Brothers og fleiri skilað af sér skrifstofuhúsnæði sem nemur um 1,8 milljónum fermetra. Og enginn kemur í staðinn inn á þessar skrifstofur.´

Frá því að fjármálakreppan skall á af fullum þunga á síðari hluta síðasta árs hafa bankar og fjármálastofnanir í Bandaríkjunum sagt upp um 177.000 manns.

Fjármálafyrirtæki á Manhattan nýta sér um fjórðung af rúmlega 120 milljón fermetrum af skrifstofuhúsnæði því sem þar er að finna. Um 40% af þessum skrifstofum eru nú til leigu.

Samkvæmt upplýsingum frá Moody´s Economy.com er talið að skrifstofumarkaðurinn í New York muni ekki byrja að ná sér á strik aftur fyrr en árið 2012.