Fríða Rún náði í silfur á EM á Ítalíu

ÍR-ingurinn Fríða Rún Þórðardóttir varð önnur í 3000 metra hlaupi á EM innanhúss hjá 35 ára og eldri sem er nú í gangi á Ancona á Ítalíu. Þetta kemur fram á heimasíðu Frjálsíþróttasambandsins.

Fríða Rún hljóp á 10:19,50 mínútum og var rúmlega tveimur sekúndum á eftir sigurvegaranum í hlaupinu en sú var Paolu Tiselli frá Ítalíu.

Fríða Rún keppir í yngsta aldursflokknum á mótinu, 35-39 ára. Hún keppir einnig í 1500 metra hlaupi og 5000 metra víðavangshlaupi á mótinu, sem stendur fram á sunnudag.

Þrír íslenskir keppendur taka þátt í EM öldunga innanhúss að þessu sinni, en auk Fríðu taka þeir Jón H. Magnússon úr ÍR, sem keppir í lóðkasti og kringlukasti í flokki 70-74 ára og Sigurður Haraldsson frá Leikni Fáskrúðsfirði, sem keppir í kúluvarpi, kringlukasti og lóðkasti í flokki 80-84 ára.