Söguleg ofurvika í kauphöll Kaupmannahafnar

Þessi vika er ein sú besta í kauphöll Kaupmannahafnar frá árinu 1996 þegar núverandi úrvalsvísitala þar, C20, var tekin í notkun. C20 hækkaði um 12,6% í vikunni. þar af 4,7% í dag, en tekið skal fram að aðeins var um fjóra virka daga að ræða þar sem kauphöllin var lokuð s.l. mánudag.

Svona mikil hækkun á einni viku hefur aðeins einu sinni orðið áður en það var í fyrrahaust. Með þessum hækkunum er C20 aftur komið á svipaðar slóðir og í febrúar en hún mælist nú rúmlega 264 stig.

Í frétt um málið á börsen.dk eru uppi vangaveltur um hvort þessi hækkun muni standa eða hvort verð á hlutabréfum muni aftur lækka í næstu viku.

Björn Schwartz forstöðumaður greiningar Sydbank segir að vorbjartsýnin hafi smitað menn á markaðinum og þar séu menn greinilega að verða áhættusæknari en í vetur.

Hann segir að komandi ársfjórðungsuppgjör félaga verði að vera jákvæð ef hækkanir eigi að halda áfram á markaðinum.