Messi kallar á Mascherano

Lionel Messi heldur áfram að kynda undir landa sínum, Javier Mascherano, með því að lýsa því enn og aftur yfir hversu mikið hann vill fá hann til félagsins.

„Auðvitað vil ég fá hann til Barcelona. Ég meina hver vill ekki spila með frábærum leikmanni eins og Javier? Vonandi kemur hann til okkar," sagði Messi sem ætlar sér stóra hluti á næsta ári.

„Ég óska mér tvennt - að Barca vinni fleiri titla og að Argentína verði heimsmeistari. Okkur dreymir að sjálfsögðu um að vinna þrennuna aftur en það verður gríðarlega erfitt," sagði Messi sem vill lítið tjá sig um upphæðina sem Real Madrid ætlar að greiða fyrir Ronaldo.

„Ef að félag vill og getur greitt slíka upphæð þá er það bara þannig. Auðvitað er þetta há upphæð en það er ekki mitt að tjá mig um þessa hluti. Ég er bara leikmaður," sagði Messi.