Teitur: Hlakka til vetrarins ef þetta er það sem koma skal

Bikarmeistarar Stjörnunnar unnu KR í hörkuleik um titilinn meistarar meistaranna í kvöld. Teitur Örlygsson var verulega ánægður með sitt lið og segir leikinn gefa góð fyrirheit um skemmtilegan vetur.

„Þetta var virkilega gaman. Við spiluðum glimrandi fyrri hálfleik, sóknarleikurinn gekk eins og smurð vél og varnarleikurinn var virkilega góður. Síðan skaut Brynjar (Þór Björnsson) þeim inn í leikinn og fór illa með okkur á köflum. En ég er mjög ánægður með að við skulum vera hér á útivelli og ekki brotna. Við stigum fastar í lappirnar og unnum sannfærandi," sagði Teitur Örlygsson sem heldur áfram að ná frábærum árangri með Stjörnuliðið.

„Það voru hörkulæti í þessum leik og ef þetta er það sem koma skal þá hlakka ég til vetrarins. Menn lögðu sig 100% fram og frábær tilþrif á köflum."