Gunnar: Vorum klárir frá fyrstu mínútu

Gunnar Einarsson átti mjög góðan leik fyrir Keflavík í kvöld þegar liðið vann sannfærandi sigur á Stjörnunni í Subway-bikarnum. Hann var stigahæstur gestaliðsins í leiknum með 27 stig.

„Við vorum klárir frá fyrstu mínútu og áttum í raun aldrei slæman kafla. Við áttum harma að hefna gegn þessu liði síðan í deildarleiknum en þar spiluðum við arfaslakan leik. Þetta var sigur liðsheildarinnar í kvöld, kaninn hjá okkur fór meiddur af velli snemma en það kom ekki að sök," sagði Gunnar Einarsson.

„Við sýndum svo sannarlega okkar rétta andlit og spiluðum vel bæði í sókn og vörn. Sjálfstraustið jókst og jókst eftir því sem á leikinn leið. Stærstu leikirnir í mínum huga eru bikarleikirnir og maður fer í þá með aðeins meira stemningshugarfari en aðra leiki."