Olíubirgðir heimsins klárast fyrr en áður var talið

Olíubirgðir heimsins eru mun nær því að klárast en viðurkennt hefur verið. Þetta er fullyrt í breska dagblaðinu Guardian í dag, þar sem einnig kemur fram að hámarki olíuframleiðslu í heiminum sé þegar náð.

Blaðið hefur eftir hátt settum ónafngreindum heimildarmanni hjá Alþjóðaorkumálastofnuninni, að stofnunin hafi vísvitandi reynt að draga úr áhyggjum í þessum þessum efnum. Það hafi verið gert til að koma í veg fyrir að áhyggjur af yfirvofandi olíuskorti valdi miklum verðhækknum á olíu.

Því hefur verið haldið fram að auka megi olíuframleiðslu úr um 83 milljónum tunna á dag, upp í 105 milljónir tunna. Enn eigi eftir að vinna mikla oliu úr þeim olíulindum sem þegar eru fundnar, auk þess sem nýjar eigi eftir að finnast.

Slíkar spár hafa verið gagnrýndar. Haft er eftir breskum þingmanni í frétt Guardian að þessar upplýsingar auki enn mikilvægi þess að árangur náist á Kaupmannahafnarfundinum um loftslagsbreytingar, sem haldinn verður í næsta mánuði.