Melissa Mitidiero byrjar vel með Val

Bandaríski bakvörðurinn Melissa Mitidiero hefur byrjað vel með Val í Iceland Express deild kvenna. Mitidiero kom til landsins eldsnemma á sunnudagsmorguninn og hefur þegar spilað tvo leiki með liðinu sem Valur hefur unnið með samtals 52 stiga mun.

Mitidiero hefur skorað 26,5 stig, gefið 4,0 stoðsendingar að meðaltali á 28 mínútum í þessum leikjum auk þess að hitta úr 8 af 15 þriggja stiga skotum sínum (53,3 prósent).

Mitidiero var með 25 stig og 4 stoðsendingar á 19 mínútum í 103-71 sigri á Snæfell í fyrsta leiknum og skoraði síðan 29 stig og gaf 4 stoðsendingar í 79-59 sigri á Grindavík í gær.

Áhrif Melissu Mitidiero má líka sjá á sóknarleik Valsliðsins sem hefur skorað 182 stig í fyrstu tveimur leikjum hennar eða 91 stig að meðaltali. Valsliðið hafði skoraði 64,4 stig að meðaltali í fyrstu 18 deildarleikjum tímabilsins.