Fisichella: Besta stund lífs míns

Giancarlo Fisichella var í hæstu hæðum eftir að hafa náð besta tíma í tímatökum og að Force India hafði slegið stórliðunum við á Spa brautinni í dag.

"Þetta var besti hringur sem ég hef ekið í Formúlu 1 og ég náð nokkrum hringjum þar sem allt gekk upp. Þetta var minn dagur og besta stund lífs míns", sagði Fisichella.

"Miðað við hvaða fjármagn við höfum, þá höfum við staðið okkur betur en McLaren og Ferrari. Við vorum tveimur sekúndum hægari en toppliðin í upphafi ársins, en erum núna nokkrum sekúndubrotum á eftir. Ég var í vanda með bílinn í gær og í morgun, en svo náðum við að vinna okkur út úr því."

"Ég vænti þess að vera meðal fyrstu 15, en ekki fremstur á ráslínu... Það væri stórmennska að ætla sér sigur, en við erum í færi á að sækja dýrmæt stig og að ljúka keppni í fyrstu sex sætunum. Það er líka möguleiki á verðlaunasæti", sagði Fisichella.

Bein útsending er frá kappastrinum kl. 11:30 á sunnudag á Stöð 2 Sport. Sjá brautarlýsingu og tölfræði um mótið.