Phelps í keppnisbann

Sundsambandið í Bandaríkjunum hefur sett landsliðsmanninn Michael Phelps í þriggja mánaða keppnisbann eftir að breska blaðið News of the World birti myndir af honum með hasspípu um síðustu helgi.

Phelps gerðist sekur um brot á reglum sambandsins sem eðlilega er ekki hrifið af eiturlyfjanotkun sundmanna sinna.

Í gær gaf hinn áttfaldi ÓL-meistari það út að hann væri ekki búinn að gera upp hug sinn varðandi þátttöku á næstu Ólympíuleikum.

Phelps er 23 ára en bann þetta kemur ekki í veg fyrir að hann geti undirbúið sig fyrir bandaríska meistaramótið sem fram fer þann 7. júlí, en þar er valið í landsliðið fyrir HM tveimur vikum síðar.