Facebook fyrir 20.000 sterkefnuð svín

Stofnandi vefsíðunnar Affluence.org lýsir henni sjálfur sem ..."Facebook fyrir sterkefnuð svín". Um er að ræða vefsíðu þar sem meðlimir verða að eiga a.m.k. 60 milljónir kr. í handraðanum eða vera með árslaun sem nema hátt í 40 milljónum kr.

Samkvæmt frásögn á börsen.dk hafa ,síðan að vefsíðunni var hleypt af stokkunum í September í fyrra, 20.000 "sterkefnuð svín" skráð sig sem meðlimi og að sögn eigenda síðunnar, Scott Mitchell, bætast á milli 300 og 400 einstaklingar við í hverri viku. Vel að merkja þetta er fjöldinn sem valinn er inn á síðuna af u.þ.b. 40 sinnum fleiri umsækjendum.

Allir sem sækja um aðild að Affluence.org fara í gegnum ítarlegt ferli til að fá úr því skorið að þeir séu í raun jafnefnaðir og þeir segjast vera. Fyrir utan upplýsingar um aldur, kyn, stöðu, raunveruleg auðæfi o.sv.fr. eru viðkomandi einnig athugaðir í leynilegum gagnabönkum sem Mitchell segist hafa aðgang að.

Það er þó til styttri leið inn á síðuna ef einhver af þeim sem þegar er skráður er viljugur til að bera ábyrgð á viðkomandi og því að hann eigi í raun framangreindar upphæðir á bankabók.

Og í fjármálakreppunni er Affluence.org stöðugt að uppfæra upplýsingar sínar um efnahag þeirra sem eru á síðunni. Fari svo að auðæfi þeirra hafi minnkað undir tilskilin lágmörk er þeim umsvifalaust hent út af síðunni.