IE-deild karla: Njarðvík og Stjarnan áfram á sigurbraut

Þrír leikir fóru fram í Iceland Express-deild karla í körfubolta í kvöld þar sem Njarðvík, Stjarnan og Tindastóll unnu góða sigra.

Leikurinn Njarðvíkur og KR í Ljónagryfjunni í Njarðvík var hnífjafn framan af og jafnt var á öllum tölum eftir fyrsta og annan leikhluta. Staðan var 25-25 eftir fyrsta leikhluta og 41-41 í hálfleik.

KR-ingar fóru hins vegar með 54-56 forystu inn í lokaleikhlutann en það reyndist skammgóður vermir.

KR-ingar leiddu 63-64 þegar fjórar mínútur lifðu leiks en þá tók við slæmur leikkafli hjá Vesturbæjarliðinu og Njarðvíkingar skoruðu 9 stig í röð og það reyndist of stór biti fyrir KR-inga og lokatölur urðu 76-68 fyrir Njarðvík.

Guðmundur Jónsson var stigahæstur hjá Njarðvík með 21 stig en Jóhann Árni Ólafsson kom næstur með 17 stig.

Hjá KR var Semaj Inge stigahæstur með 20 stig en Brynjar Þór Björnsson kom næstur með 17 stig. Njarðvík hefur alla fimm leiki sína til þessa en þetta var fyrsta tapa KR í fimm leikjum.

Stjarnan hélt sigurgöngu sinni áfram með 83-92 sigri gegn ÍR í kaflaskiptum leik. ÍR leiddi leikinn lengi vel gegn Stjörnunni í Kennaraháskólanum í kvöld en staðan var 32-26 heimamönnum í ÍR í vil í hálfleik.

ÍR hafði enn forystu 60-50 fyrir lokaleikhlutann en þá settu gestirnir í Stjörnunni í fluggír og skoruðu 32 stig gegn 13 stigum ÍR.

Justin Shouse átti enn einn stórleikinn fyrir Stjörnuna í kvöld en hann skoraði 37 stig, tók 10 fráköst og átti 5 stoðsendingar. Jovan Zdravevski kom næstur með 22 stig og Kjartan Kjartansson skoraði 16 stig.

Hjá ÍR var Nemanja Sovic atkvæðamestur með 19 stig en Steinar Arason skoraði 17 stig. Stjarnan hefur unnið alla fimm leiki sína til þessa í deildinni.

Þá vann Tindastóll sinn fyrsta leik í deildinni í vetur þegar Breiðablik kom í heimsókn en lokatölur urðu 66-52.

Amani Bin Daanish var stigahæstur hjá Tindastóli með 20 stig en hann kom til liðsins frá Grindavík á dögunum. Svavar Atli Birgisson kom næstur hjá Tindastóli með 16 stig og 8 fráköst.

Hjá Breiðabliki var John Davis atkvæðamestur með 16 stig og 13 fráköst.

Úrslit kvöldsins:

Njarðvík-KR 76-68 (41-41)

ÍR-Stjarnan 83-92 (32-26)

Tindastóll-Breiðablik 66-52 (35-27)