Stjarnan einum sigri frá titlinum eftir stórsigur í Safamýri

Stjörnukonur eru einum sigri frá því að vinna Íslandsmeistaratitilinn þriðja árið í röð eftri átta marka útisigur á Fram, 27-19, í öðrum leik liðanna í lokaúrslitum N1 deildar kvenna í handbolta.

Stjarnan hafði yfirburði í leiknum frá fyrstu mínútu, komst í 4-1, 8-3 og var sjö mörkum yfir í hálfleik, 17-10. Stjarnan náði mest ellefu marka forskot í seinni hálfleik, 21-10, en vann að lokum mðe átta marka mun.

Stjarnan vann fyrsta leikinn í Mýrinni með sjö marka mun, 38-31, og hefur því haft mikla yfirburði í einvíginu. Þriðji leikurinn fer fram í Mýrinni á sunnudaginn og þar getur Stjarnan tryggt sér Íslandsmeistaratitilinn.

Alina Petrache skoraði níu mörk fyrir Stjörnuna og Sólveig Lára Kjærnested var með sex mörk. Karen knútsdóttir skoraði mest fyrir Fram eða fimm mörk.

Fyrri hálfleikur

Stjarnan er með örugga sjö marka forystu í hálfleik, 17-10, í öðrum leik liðsins gegn Fram í úrslitum N1 deildar kvenna.

Fram gaf tóninn í fyrstu sókn leiksins þegar liðið kastaði boltanum útaf eftir örfáar sekúndur. Fram hefur tapað boltanum 13 sinnum í hálfleiknum sem gengur ekki gegn eins sterku liði og Stjörnunni.

Stjarnan náði fljótt góðu forskoti, 1-5, og hefur Fram aldrei náð að minnka muninn í minna en fjögur mörk eftir það en staðan var 10-14 þegar innan við tvær mínútur voru til leikhlés. Stjarnan skoraði þá þrjú mörk í röð og hefur svo gott sem gert út um leikinn nema allt annað Framlið mæti til leiks í síðari hálfleik.

Varnarleikur Fram hefur verið í molum og sóknarleikurinn tilviljunarkenndur og ekki sú barátta í liðinu sem liðið sýndi í undanúrslitum gegn Haukum.