Kröfur í þrotabú Glitnir Privatökonomi nema 700 milljónum

Kröfur í þrotabú fyrrum fjármálaþjónustu Glitnis í Noregi, Glitnir Privatökonomi, nema nú yfir 40 milljónum norskra kr. eða yfir 700 milljónum kr.

Samkvæmt frétt um málið á vefsíðunni e24.no skiptast kröfurnar þannig að yfir 30 milljónir norskra kr. eru skaðabótakröfur frá óánægðum viðskiptavinum vegna lélegrar fjármálaráðgjafar og um 10 milljónir norskra kr. eru vegna lána frá eigendum Glitnir Privatökonomi en félagið hefur skipt um nafn og eigendur tvisvar síðan það komst í þrot í fyrra haust.

Síðasta föstudag var haldinn fyrsti skitpafundurinn í Kapitalhuset en það var síðasta nafnið á fjármálaþjónustunni þegar hún var tekin til gjaldþrotaskipta eftir áramótin.

Í umfjöllun e24.no um helgina kom fram að Neytendastofa Noregs taldi að Glitnir Privatökonomi væri versta dæmið sem til væri í Noregi um villandi og misvísandi fjármálaráðgjöf þar sem áherslan var lögð á sölu eigin fjármálagerninga en ekki að liðsinna viðskiptavininum sem best eftir hans eigin þörfum.

Skiptastjórinn, Arne V. Njöten, segir að enn sé of snemmt að segja til um hvernig þrotabúið muni meðhöndla þær kröfur sem borist hafa.