Brawn á flugi, afhroð McLaren og Ferrari

Jenson Button á Brawn Mercedes náði besta tíma í tímatökum á Sepang brautinni í Malasíu í dag. Tímatakan var mjög jöfn og spennandi, en Jarno Trulli rétt missti af fremsta stað á ráslínu til Buttons.

McLaren og Ferrari gekk illa í tímatökunni. Felipe Massa féll út í fyrstu umferð af þremur og verður sextándi á ráslínu. Meistarinn Lewis Hamilton er þrettándi og tveir aðrir meistarar, Kimi Raikkönen níundi og Fernando Alonso tíundi.

Nýju reglurnar virðast virka vel og hafa ruglað röð efstu manna frá fyrri árum, allavega í fyrstu mótum ársins. Button vann fyrsta mót árins og leiðir því stigakeppni ökumanna og Brawn lið hans er með gott forskot í stigakeppni bílasmiða.

Rubens Barrichello lenti í því að bíll var fyrir honum í brautinni í hröðum hring og hann hyggst gera athugsemd við dómara útaf því.

Bein útsending er frá kappakstrinum í Malasíu kl. 8.30 í fyramálið og er útsendingin í opinni dagskrá.

sjá nánar um tímatökuna og mótshaldið