Kristján Einar lánsamur að geta keppt

Kristján Einar Kristjánsson lauk keppni um helgina í sinni fyrstu Formúlu 3 keppni á þessu ári, en hann keppir í opnu evrópsku Formúlu 3 mótaröðinni sem er skipulögð af Spánverjum og fer fram víða í Evrópu, m.a. á þekktum Formúlu 1 brautum.

"Allar mótaraðir heimsins eru að fá stór högg í fjölda ökumanna og ég þekki marga reyndari ökumenn sem hafa misst samstarfsaðila og ekki náð að fjámagna áframhaldandi keppni í ár. Það hefur fækkað alls staðar. Mótaröðin sem ég keppti í á síðasta ári, breska Formúla 3 hefur farið úr 36 bílum niður í 18 í ár. Opna Evrópska er á sínu fyrsta ári, en hún byggir á Spænsku Formúlu 3 og þar kepptu 32 bílarí fyrra, en í ár erum við 22", segir Kristján Einar sem keppti í Formúlu 3 í Bretlandi í fyrra.

"Ástæða þessarar fækkunar er alls staðar sú sama - í efnahagskreppu eru markaðsstyrkir, íþróttaamstarf og þess háttar með því fyrsta sem fyrirtæki skera niður. Ég geri mér fyllilega grein fyrir þessu ofan á þá staðreynd sem ástandið á Íslandi er og vegna þessa er þvílíkur léttir að vera kominn af stað í keppni og tilfinningin sem ég fékk við að ræsa í fyrsta Valencia F3 kappakstrinum var tær hamingja og stolt yfir því að vera í brautinni."

Sjá blogg Kristjáns um kappaksturinn