Byssu-Burress vill spila aftur með Giants

Plaxico Burress, sem komst í fréttirnar í fyrra fyrir að skjóta sjálfan sig í fótinn, segist vilja komast aftur í lið NY Giants í NFL-deildinni þó svo hann hafi brennt flestar brýr að baki sér hjá liðinu.

Burress mun komast að því í næsta mánuði hvort hann geti það því þá fara fram réttarhöld yfir honum en hann er ákærður fyrir ólöglegan vopnaburð.

Verði hann dæmdur til fangelsisvistar er tíma hans hjá NY Giants líklega lokið og ekki ólíklegt að NFL-deildin dæmi hann einnig í leikbann.

Burress var staddur á næturklúbbi með byssu í buxunum þegar skot hljóp úr byssunni í lærið á honum.

Hann var þá fyrir á hálum ís hjá félaginu, búinn að brjóta flestar agareglur og virtist ekki eiga mikla framtíð fyrir sér hjá félaginu.

Þó svo hann sé vandræðagemsi var hann liðinu mikilvægur og það saknaði hans sáran í úrslitakeppninni.