Kosið verður um uppgjörið hjá Kaupþingi á Mön

Eyjaskeggjar á Mön sem áttu innistæður hjá útibúi Singer & Friedlander banka Kaupþings á eyjunni munu á næstunni kjósa um hvort þeir gangi að samkomulagi stjórnvalda á Mön um uppgjör á kröfum þeirra.

Samkvæmt samkomulagi stjórnvalda og núverandi stjórnar útibúsins munu þessir íbúar á Mön, yfir 2.000 talsins, fá 70% af kröfum sínum greiddar á næstu tveimur árum.

Í frétt um málið á BBC segir að ef innistæðueigendur samþykki þennan samning í sérstökum kosningum mun dómstóll á eyjunni virkja samkomulagið. Fari svo að samkomulagið verði fellt í þessum kosningum verður útibúinu skipt upp sem þrotabúi.

Talið er að mjótt verði á mununum í þessum kosningum að því er segir í frétt BBC.

Allan Bell fjármálaráðherra Manar segir að samkomulagið sé ekki fullkomið en að stjórnvöld telji að innistæðueigendurnir muni fá meira endurgreitt af innistæðum sínum með því heldur en þeir gætu fengið úr þrotabúi Singer & Friedlander.

Kröfuhópar innistæðueigenda (KSFIOM) hafa sagt að þeir telji að gera eigi útibúið upp sem þrotabú því með þeim hætti fengju þeir innistæður sínar greiddar strax úr tryggingarsjóði innistæðueigenda á Mön, það er upp að 50.000 punda hámarki sem er sama upphæð og tryggingarsjóður innistæðueigenda á Bretlandseyjum tryggir fyrir.

Síðar gætu þeir þar að auki fengið væntanlega eitthvað einnig úr sjálfu þrotabúinu.