Perez: Möguleiki að Kaka verði leikmaður Real í kvöld

Haft er eftir Florentino Perez, forseta Real Madrid, í ítölskum fjölmiðlum í kvöld að hann vonast til þess að hægt verði að staðfesta að Brasilíumaðurinn Kaka sé genginn í raðir Real Madrid í kvöld.

„Ef Kaka ákveður að fara frá AC Milan kemur Real Madrid aðeins til greina fyrir hann," sagði Perez. „Það er mögulegt að hann verði kynntur til sögunnar sem leikmaður Real Madrid í kvöld."

Brasilíska knattspyrnusambandið greindi frá því í dag að Kaka hefði gengist undir læknisskoðun í dag að beiðni Real Madrid.

Perez mun einnig hafa sagt í viðtalinu að hann vilji gjarnan fá Cristiano Ronaldo frá Manchester United. „En fyrst verðum við að ræða við Manchester United. Það allra mikilvægasta er að viðhalda góðum tengslum við United."

Hann nefndi einnig Svíann Zlatan Ibrahimovic til sögunnar en hann er sagður vilja fara frá Inter í sumar. „Ibrahimovic og Ronaldo eru meðal bestu leikmanna heims en það er ekki hægt að fá þá alla til Madrídar."