Williams í viðræðum við Barrichello

Rubens Barrichello er í viðræðum við Williams liðið og Nico Hulkenberg sem er meistari í GP 2 mótaröðinni hefur verið ráðinn til liðsins.

Þetta þýðir að Kazuki Nakajima yfirgefur liðið og talið er að Nico Rosberg fari til Brawn í stað Barrichello. Þetta fullyrðir tímaritið Autosport og segir að Barrichello hafi nýlega heimsótt Williams. Frank Williams vilji reyndan ökumann við hlið Hulkenberg, en Barrichello er talinn afar snjall í uppsetningu keppnisbíla á mótsstað og hefur Jenson Button oft kóperað hans uppsetningu á árinu.

Button er enn í samningaviðræðum við Brawn og virðist himinn og haf á milli þeirra launa sem hann vill fá og liðið er tilbúið að bjóða. Á meðan bíður Barrichello átekta og skoðar aðra möguleika. Ross Brawn segir að lið sitt muni ákveða mál ökumanna eftir keppnistímabilið.

Rosberg var um tíma orðaður við McLaren, en nú virðist Kimi Raikkönen á leið þangað, um leið og Fernando Alonso fer til Ferrari og ekur með Felipe Massa. Mikið rót er á ökumannsmarkaðnum, en ljóst að Robert Kubica fer til Renault. Á næsta ári verða 28 ökumenn á ráslínunni í stað 20 í ár.