West Ham: Straumi liggur ekkert á að selja

Stjórn enska úrvalsdeildarliðsins West Ham hefur sett yfirlýsingu inn á heimasíðu West Ham. Þar segir að CB Holding, eigenda liðsins sem er að mestu í eigu Straums, liggi ekkert á að selja West Ham. Í yfirlýsingunni segir að hún sé sett á heimasíðuna vegna mikilla vangaveltna í fjölmiðlum um framtíð West Ham.

Í yfirlýsingunni segir: „Eigandi okkar CB Holding hefur gert það ljóst að hann vill finna nýjan eigenda að liðinu á næstu þremur árum og það er enn málið.

Á síðustu mánuðum hafa margir áhugasamir aðilar sagt að þeir hafi áhuga á að fjárfesta í West Ham. Liðið hefur átt í mörgum viðræðum við þessa aðila og þær halda áfram.

CB Holding er ekki undir neinum þrýstingi til að semja um sölu í náinni framtíð en liðið mun halda stuðningsmönnum sínum upplýstum um þróunina þegar slíkt er við hæfi."