Buffett græðir yfir 2 milljarða dollara á Goldman Sachs

Gengishagnaður ofurfjárfestisins Warren Buffett á kaupum á hlutabfréfum í Goldman Sachs s.l. vetur er nú kominn í 2,2 milljarða dollara eða tæplega 280 milljarða kr. Þetta kemur fram á Bloomberg fréttaveitunni.

Goldman Sachs leitaði til Buffett í kjölfar þess að Lehman Brothers urðu gjaldþrota s.l. haust og Bank of America hafði tekið yfir Merill Lynch til að forða þeim banka frá gjaldþroti. Buffett ákvað að leggja Goldman Sachs til fjármagn í gegnum eignarhaldfélag sitt Berkshire Hathaway.

Bara það að Buffett var tilbúin að koma inn í Goldman Sachs með fé var nóg til þess að stöðugleiki komst á hluti í Goldman Sachs sem höfðu verið í frjálsu falli á markaðinum fram yfir áramótin síðustu.

Buffett fékk kauprétt á hlutum í Goldman Sachs að upphæð 5 milljarða dollara á genginu 115 dollarar á hlut. Í dag stendur gengið í 162 dollurum. Þetta er ávöxtun upp á 44% fyrir Buffett og ef hann kysi að leysa til sín hlutina í dag fengi hann 2,2 milljarða dollara í vasann sem hagnað af viðskiptunum við Goldman Sachs.

„Það hlýtur að vera gott að vera Warren Buffett," segir Gerald Martin prófessor í fjármálastarfsemi við Kogod viðskiptaháskólann í Washington en hann hefur rannsakað viðskiptasögu Buffetts. „Þessar tölur koma eins og blaut tuska í andlit þeirra sem segja að Buffett hafi tapað neista sínum."