Sigurganga Barcelona heldur áfram á Spáni

Barcelona var með sannkallaða markasýningu í fyrri hálfleik gegn Atletico Madrid á Nývangi í kvöld þegar Börsungar læddu inn fjórum mörkum á móti einu marki gestanna en leikurinn endaði 5-2.

Zlatan Ibrahimovic kom Barcelona á bragðið strax á 2. mínútu leiksins og Lionel Messi bætti við öðru marki á 16. mínútu.

Daniel Alves og Seydou Keita bættu svo við tveimur mörkum áður en Sergio Aguero minnkaði muninn í lok fyrri hálfleiks.

Diego Forlan minnkaði svo muninn fyrir Atletico í síðari hálfleik en það reyndist skammgóður vermir þar sem Messi bætti við öðru marki sínu í leiknum og fimmta marki Börsunga áður en yfir lauk.

Niðurstaðan varð því eins og segir 5-2 sigur Barcelona sem hefur unnið alla þrjá leiki sína í deildinni til þessa.

Önnur úrslit kvöldsins á Spáni:

Deportivo La Coruna-Espanyol 2-3

Real Mallorca-Tenerife 4-0

Malaga-Racing Santander 1-2

Osasuna-Sevilla 0-2