Ungfrú Ameríka fékk ekki miða á Superbowl

Nýkrýnd ungfrú Ameríka, Katie Stam, verður líklega að sætta sig við að horfa á leikinn um ofurskálina í NFL í sjónvarpinu.

Þessi 22 ára gamla snót var krýnd fegursta stúlka Bandaríkjanna í Atlantic City um síðustu helgi og verður í Tampa á laugardaginn þar sem hún tekur þátt í góðgerðasamkomu.

"Ég elska ruðning og væri til í að fara á leikinn - en við eigum enga miða," sagði Stam, sem er fyrsta stúlkan frá Indiana til að vera kjörin fegursta stúlka Bandaríkjanna.

Það verða Pittsburgh Steelers og Arizona Cardinals sem leika til úrslita um ofurskálina á sunnudagskvöldið og verður leikurinn sýndur beint á Stöð 2 Sport eins og undanfarin ár.

Þar verður mikið um dýrðir á þessum stærsta sjónvarpsviðburði heimsins og meðal skemmtiatriða má nefna að sjálfur "stjórinn" Bruce Springsteen tekur lagið í hálfleik.