Ætla að hafa reksturinn óbreyttan

Sala á sænska bílaframleiðandanum Volvo frá bandaríska félaginu Ford Motor Co. til kínverska bílaframleiðandans Zhejiang Geely Group gengur líkast til í gegn á fyrsta fjórðungi næsta árs.

Ford hefur staðfest við fjölmiðla að samkomulag um söluna sé nær frágengið. Enn á þó eftir að fá samþykki stjórnvalda og ganga frá fjármögnun.

Ford hefur ekki upplýst um söluvirði félagsins. AP hefur þó eftir sérfræðingi á sviði bíliðnaðar að verðmætið geti hlaupið á 2,0 til 2,3 milljörðum Bandaríkjadala, en það eru á milli 250 og 300 milljarðar króna. Ford lýsti því yfir fyrir ári að Volvo væri til sölu, en Ford var þá í töluverðri fjárþörf, hafði tapað 14,6 milljörðum dala (1.868 milljörðum króna) á árinu. Síðan hefur orðið nokkur viðsnúningur í rekstrinum og horfur á hagnaði frá og með þarnæsta ári.

Salan á Volvo heldur engu að síður áfram. „Hún snerist aldrei um Volvo, sem við vitum að er sterkt vörumerki, heldur fremur um stefnuna sem við höfum tekið með Ford," segir Mark Truby, talsmaður Ford.

Þá segja sérfræðingar að Volvo muni eflast af sterku baklandi í kínverska félaginu, en forsvarsmenn þess hafa jafnframt sagst ætla að halda áfram rekstri sænska félagsins í óbreyttri mynd. - óká